كان فيه مرة واحد زارع شجرة تفاح في جنينة بيته ، و من تاني يوم بعد زراعتها ، و قبل ما الشجرة تكبر ، بيعدي  عليها و يستغرب ؛ هي ليه لسه ما طرحتش !!!!

كان يوم يرويها و يوم ينسى ، ما بينظفهاش إلا كل فين و فين ، و ما كانش بيحطلها السماد بصورة صحيحة  ؛ و لسه منتظر منها التفاح.

الشجرة بدأت تذبل و تصفر….. الشجرة بتموت و هو مستني منها التفاح .

أخيراً صاحبنا قرر يأجر حد بيفهم في الشجر و كيفية رعايته ؛ عشان يرعى الشجرة و يفهم صاحبنا يعمل ايه عشان الشجرة ما تموتش ، و تطرح تفاح .

صاحبنا ده عمل مجهود ، اشترى الشجرة ، و زرعها ، و سقاها لحد ما وصلت لحد معين ، بعد كده كانت محتاجة لرعاية مختلفة ، هو ما يعرفش يعملها ، لعدم إدراكه بالكيفية ، عشان كده كان لازم يستعين بحد خبير يوصل بالشجرة لبر الأمان .

عارفين مين صاحبنا ده ، هو الشعب  المصري ، و الشجرة  هي البلد بعد ما اتولدت من جديد ، و الجنايني هو اللي احنا هنختاره بعناية بعد توفيق من ربنا عشان يقود البلد …..

الشعب  عمل  مجهود جبار أيام الثورة ، ونجح نجاح باهر ، و بأسلوب  جميل أبهر العالم كله ؛ لكن الأسلوب ده كان  ليه وقت معين و مرحلة معينة ، بعدها كان لازم يتغير ، و بما إن نفس  الأسلوب  استمر مع بعض الأفراد لفترة أطول من اللازم ؛ ظهرت آثاره الجانبية …

الحمد لله ؛ قطاع كبير من الناس بدأ يفهم ده و يستجيب ليه …. لكن لسه مرحلة اختيار الراعي المثالي لشجرة مصر عشان ما تموتش و تكبر و تخضر و تطرح حرية و عدالة و مساواة و….. و تفاح كمان لو عايزين