أنا دُعيت قبل كده إني أبعد عن التشاؤم في الكتابة أكتر من مرة ، و انا شايف إن ده صح …. خاصةً في فترة الواحد محتاج فيها ذهن صافي و مزاج ( فللي ) عشان نعرف نشتغل …   لكن  ==== >  أنا لازم اقول  اللي  هقوله لأني مش قادر أعمل حاجة ممكن تغير الوضع المزري اللي احنا فيه غير إني أتكلم …

اللي احنا وصلناله في المرحلة الأخيرة عجيب جداً و محير جداً …. احنا طلعنا أحسن حاجة عندنا ، و في نفس الوقت أسوأ حاجة عندنا … مش  كل  الناس  عملت كده … لكن المجمل  اللي  طلع مننا للعالم  كشعب … شعب كان بيحاول  يستعيد مكانته …..

زي ما  قلت قبل كده … احنا بنحاول نشيل آثار الفساد و الخراب اللي في  البلد بقاله سنين … و نازلين تخبيط و عجن في كل الأطراف  المسئولة … ما بعفيهمش من المسئولية ؛ لأنهم ببساطة على مستواهم  بردو بيعجنوا  عجن  تمام …

لكن المشكلة في  القوة الأساسية …. الأفراد … الناس  نفسهم … أثبتوا للأسف إننا شعب لازم يتمسكله عصاية و يتحط على رقبته سيف ، و ده واضح من اللي  بيحصل كل يوم من قلة أدب و فرد ذراع و احتكار و سرقة و بلطجة و قطع طريق و  قتل … في خلال 5 شهور مصر  فقدت العديد من الكوادر في  مجالات كتير  بسبب قطاع الطرق … و الحسابة بتحسب … كنا فاكرين نفسنا أحسن من شعوب  كتير و ماسكينها  لبانة  كل  ما تيجي  مقارنة  بيننا و بينهم  ….

اللي احنا عملناه على  مدار ال9 شهور اللي فاتت يتمثل في غننا غسلنا الهدوم إلى حد ما كويس ، لكن نشرناها على  حبل مصدي و عليه أكوام تراب ، و ما شطفناش  الهدوم من الصابون اللي عليها ، و هتلم تراب من الهوا …