فرق كبير بين الذوق و البلاهة

الذوق هو انك وانت سايق تهدي و تقف عشان تعدي واحد مش عارف يعدي الطريق.

البلاهة إنك تلمح واحدة واقفة و عايزة تعدي تفرمل فجأة عشان تعديها  و اللي جاي وراك يخبطك.

فرق كبير بين الشجاعة و التهور

الشجاعة هي إنك ما تخافش تعمل اللي المفروض تعمله  … ما تخافش تقول  الحق …. ما تخافش تعترف  بغلطك

التهور هو إنك تحاول تعمل  بهلوان و تعرض حياتك أو حياة  غيرك للخطر من غير سبب قهري يستدعي  كده

فرق كبير بين المثابرة و المكابرة

المثابرة إنك تتفانى في شغلك مهما كانت الصعوبات عشان ترضي ربك و توصل لهدفك

المكابرة هي إنك تستمر في عمل انت عارف إنك هيقودك للفشل لكن مستمر فيه لمجرد إنك مش عايز تعنرف بغلطك أو مش عايز تقبل النصيحة

فرق كبير يبن السياسة و الطبيخ

السياسة  هي إنك تاخد كل حاجة بعقل و تروي و سلاسة و تدي كل حاجة حقها من أول السياسة بين الدول لحد سياسة تقدير الكميات و المقادير في الطبيخ

الطبيخ هو إنك تطبق سياسة (اهو كله أكل و بيتّاكل في الآخر ) على كل  حاجة في  حياتك

فرق كبير بين الثورة و الهمجية

الثورة هي إنك تقوم من سباتك العميق و غفلتك عشان تغير وضع خطأ باسلوب يحقق فايدة أكتر مما يحقق ضرر

الهمجية هي إنك تعترض على اي حاجة و كل حاجة لمجرد الاعتراض و من غير حتى ما تكون عارف انت عايز ايه بالضبط…