العقل البشري ، من أعظم مخلوقات ربنا ، و هو اللي  ربنا كرمنا بيه على باقي المخلوقات.

لكن المفروض إن كلنا عارفين إن عقلنا هو اللي  بيتيحلنا نتحكم في  نفسنا و نسيطر على أفعالنا ؛ طيب جميل جداً … إزاي بقى نسيطر على العقل ؟؟

السؤال غريب شوية ، لكن محتاج إجابة ؛ لأن عقلنا ممكن يصورلنا حاجات غريبة أو يخلينا نتصرف  تصرفات ما لهاش تفسير لكن مع كده في  وقتها ما بنفكرش أساساً إن اللي بنعمله ده غلط …. على سبيل  المثال : و أنا طالع البيت النهاردة كنت ماسك في إيدي مفتاح البيت و مفتاح العربية و أو ما شفت باب الشقة ، بدون تفكير لقيتني  بضغط على زرار ال   (unlock) في ريموت العربية ، لا و ايه … مصمم ان باب  الشقة  يفتح..

أنا أعتقد إن اللي  حصل ده و الحاجات اللي  بتحصل  شبهه و بتتكرر معان كتير بتكون ناتجة من تجارب و معلومات عند المخ ؛ يعني  في  حالتي  مثلاً : عقلي  عارف إن المفتاحين وظيفتهم الفتح ، لكن ايه اللي خلى الحكاية تتلخبط مع اني بستخدم المفتاحين في مكانين  مختلفين  كل  يوم ؟؟؟

ما لقيتش  تفسير إلا إني  كنت تعبان جداً فبالتالي حصل  اللي حصل ….. معنى  كده إن أنا فقدت السيطرة  للحظات … معنى كده ان  احنا لينا سيطرة على الحاجات اللي العقل  بيترجمها تلقائياً …بدليل ان السيطرة دي ممكن تختل في  وقت من الأوقات تكون طاقة الجسم  قليلة مثلاً ….

أعتقد ده يفهمني إن مش كل حاجتين بيؤدوا نفس  الوظيفة ممكن ينفعوا في مكانين مختلفين …. ولّا ايه ؟؟؟